Музей савецка-польскай баявой садружнасці

Мы рады вітаць Вас на сайце Музея савецка-польскай баявой садружнасці

Музей савецка-польскай баявой садружнасці быў адкрыты 15 кастрычніка 1968 года ў гонар 25-й гадавіны бітвы пад Леніна Першай Польскай пяхотнай дывізіі ім. Т. Касцюшкі сумесна з савецкімі дывізіямі супраць нямецка-фашысцкіх захопнікаў.

Музей уваходзіць у склад мемарыяльнага комплексу савецка-польскай баявой садружнасці, які з'яўляецца гісторыка-культурнай каштоўнасцю Рэспублікі Беларусь.

З 2014 года музей савецка-польскай баявой садружнасці з'яўляецца філіялам дзяржаўнай установы культуры «Горацкі раённы гісторыка-этнаграфічны музей».

Экспазіцыя музея савецка-польскай баявой садружнасці прысвечана сумесным баявым дзеянням савецкіх дывізій і Першай Польскай пяхотнай дывізіі ім. Т. Касцюшкі ў гады Вялікай Айчыннай вайны.

Матэрыялы экспазіцыі таксама знаёмяць наведвальнікаў з гісторыяй узнікнення і фарміравання Войска Польскага. Тут жа прадстаўлены ўзоры зброі, прадметы амуніцыі, асабістыя рэчы ўдзельнікаў баёў, а таксама шматлікія дакументы і фатаграфіі.

Цэнтральнае месца ў экспазіцыі музея адведзена дыяраме «Бой пад Леніна», якая створана мастакамі маскоўскай Ваеннай студыі імя Грэкава. На ёй намаляваны кульмінацыйны момант сумеснага нападу савецкіх і польскіх салдат.

Значнае месца ў экспазіцыі музея займае вітрына-экспазіцыя «У адзіным страі», у якой прадстаўлены памятныя падарункі і сувеніры, якія апавядаюць аб пасляваенным супрацоўніцтве Беларусі і Польшчы.